Thursday, July 07, 2011

老人院暴動記

那一夜,可以想像有多混亂。

「喂,xx呀,你幫我登記攞左d錢未?」連兩小時發生的事都記不起了,偏偏卻記住政府大派六千蚊。已經遷進老人院的阿麻告訴我,那天晚上大家圍著看新聞,忽然聽到人人有錢分,院友個個狅喜,暴動般的各自爭相打電話給家人,問道:幫我攞左錢未?

我阿麻當然無執輸,她引述被我堂阿哥以「得啦,得啦」四個字敷衍收場。一直心有不安,周末甫見到我就說有事要問我,我以為又是何時結婚呀、細妹幾多歲呀、細佬宜家做什麼等每次例必一問又例必忘記的問題,但卻獲覆「唔係呢問樣」、「唔係問果樣」,只是她想來想去卻想不到,幾乎要發忟憎了。

我知道她喜歡看新聞,就循那時的新聞內容引導她,不出一兩個話題她就記起了:係喎,政府派錢喎,你地幫我攞左未!然後我逐一抽絲剝繭,拼合了當時老人院內的情況。

不過,無論我說了幾多遍,上網登記便可,我阿麻依然幾番問:幾時可以去銀行攞?我相信8月28日的銀行門口,一定會被迫爆呀。我還有個多月的時間,向我阿麻做「心理輔導」,希望她不會成為當日中暑暈倒的一員。

No comments: